A Concellería de Medio Ambiente de Porto do Son está a facer traballos de eliminación de varios puntos de vertidos incontrolados en diferentes recantos do termo municipal, un problema que se mantén e que se reproduce cada pouco malia o intenso labor de concienciación e sensibilización despregado polo Goberno sonense, traballo que se completa co servizo do punto móbil que percorre regularmente as parroquias do concello.
Dende o Consistorio fan un movo chamamento ao civismo en materia de xestión de refugallos e recordan á cidadanía que teima en desfacerse do seu lixo en calquera lugar que os servizos de recollida municipais son de balde. Inclúen punto limpo fixo, punto limpo móbil e recollidas periódicas.
Se por algunha razón existise calquera dúbida o Concello pon a disposición da veciñanza as súas redes sociais e o teléfono 981 867 412 📞 O Goberno local lembra que “o camiño da sustentabilidade e do coidado do medio ambiente témolo que percorrer todos xuntos e no mesmo sentido”.
