A situación da pandemia obrigou á Xunta de Galicia a repensar o seu plan de Nadal. Tal e como anunciou o conselleiro de Sanidade, Julio García Comesaña, desde as 00.00 horas do día 23 ata as 23.00 horas do día 25, a cidadanía poderá desprazarse entre municipios a pesar dos peches perimetrais por motivos de visita familiar.
En canto ás comidas a Consellería de Sanidade modificou o plan de nadal que rexerá os próximos días establecendo límites ao número de persoas que poden participar en reunións familiares se se xunta máis dunha unidade de convivencia. En concreto, este límite será, como establece o plan elaborado a nivel nacional, dun máximo de 10, incluídos nenos de 10 anos ou menos.
Con todo, a Xunta recomenda que as celebracións destas datas se fagan só na unidade familiar de convivencia, nese caso non hai límite de persoas.
Ademais, no caso de que se trate de máis de dúas unidades familiares, Sanidade mantén o límite de adultos en seis persoas. A maiores, establece que os nenos de idade igual ou inferior aos 10 anos, que no seu momento determinouse que non contarían para o cómputo, non poderán superar os catro, co que sumarían un máximo de 10 participantes.
