Nace o Partido Galego con representación na xestora do Barbanza

En Melide foi presentado este sábado o novo Partido Galego, unha formación galeguista e con talante europeísta.

O Partido Galego conta cunha xunta xestora con representantes das comarcas de Xallas, Bergantiños, Barbanza, Compostela, Sar, Terra do Queixo(Arzúa-Melide), Lugo e Ourense.

Segundo indican desde o partido é “unha forza política situada no espazo do galeguismo, da moderación, e no equilibrio medioambiental. O seu espazo é o centro transversal con políticas con esencia galeguista e de potencialidade galega no mundo, do que forman parte persoas con ampla experiencia política”.
Entre os seus membros atópase con Xosé Mosquera, exmembro de Compromiso por Galicia e vinculado coas diferentes correntes galeguistas ao longo da historia.

Ademais de Mosquera atópase Xesús Ares, que estará á fronte da área de Coordinación do novo partido, que se ofrece como un proxecto transversal, galeguista e cunha visión europeísta e de converxencia.

O resto de integrantes da comisión permanente serán Maximino Vázquez (portavoz), Óscar Casais (organización), Montse Almozara (finanzas), Xabier Vázquez (municipal), José Antonio Díaz Rodríguez (empresas), Paula María Rey (autónomos), Anxo Franco ( emprego), Rubén Vilasenín (Medio ambiente), Cristina Barcia (comunicación) ou Xabier Pintos (medio rural).

Durante a presentación do proxecto, Mosquera incidiu na necesidade de impulsar un partido “en defensa” da sociedade e da lingua propia, que estea “convencido” de que se sitúa nun marco europeo e que debe “mirase á Eurorrexión”.

Por iso, este novo partido debe primar a “interlocución” e o diálogo para recibir os “impulsos que hai na sociedade” e construír este país “con todos”.

“Temos que estar atentos a eles, ser receptivos e ter unha capacidade de diálogo moi grande”, engadiu, pero sen caer en ‘ apriorismos’.

Acto de presentación do Partido Galego en Melide