Galicia considera sumamente decepcionantes as cotas de pesca fixadas para o ano que vén

A comunidade galega ve cativos os avances obtidos en relación coa proposta inicial da Comisión Europea a pesar de tantas horas de negociación e tendo en conta tanto o contexto de pandemia actual como a incerteza derivada do brexit

A conselleira do Mar lamenta a falla de sensibilidade mostrada polo Executivo comunitario cara un sector que foi declarado esencial durante a alerta sanitaria polo coronavirus e que fixo un importante esforzo nos últimos anos para manter os caladoiros nos que faena en bo estado biolóxico.

O Goberno galego considera que Bruxelas actuou con demasiada rigorosidade ao establecer rebaixas para o linguado, a pescada sur ou a cigala e fixar un mínimo incremento para a anchoa no Cantábrico pese a que a especie se atopa na segunda maior cifra de abundancia da serie histórica

Outro asunto preocupante é o establecemento de medidas técnicas de protección do bacallau en Gran Sol, que fai prever o endurecemento da normativa para as artes empregadas polo arrastre galego a pesar de ser altamente selectivas.

Por este motivo, a delegación galega considera o acordo totalmente negativo para o Cantábrico-Noroeste e moi preocupante á espera do que ocorra en Gran Sol ante a negociación do brexit. Polo momento nestas augas, e para os tres primeiros meses de 2021, establécense unhas cotas estables e proporcionais ás fixadas para este ano.

Entre as únicas cuestións positivas que salientou a titular de Mar, e que aínda terán que plasmarse en feitos no futuro, está o compromiso de que o Consello Internacional para a Exploración do Mar (CIEM) avaliará aquelas especies que están en bo estado biolóxico de cara a flexibilizar os seus TAC e paliar a subutilización de cotas derivada da pandemia.

A este compromiso súmase o de avaliar de novo a cigala do Cantábrico para incluír os bos datos da campaña científica de 2020 no informe do CIEM de 2019, que prevía o peche da pesqueira durante tres anos. Neste sentido, Galicia defendía o establecemento dun TAC anual que permitise a apertura da pesqueira en condicións sostibles e acordes cunha análise rigorosa do estado do recurso como se fixo nos últimos anos para coñecer a súa evolución.

Ante este mal resultado, a conselleira do Mar ofreceu á frota pesqueira galega todo o seu apoio e compromiso de traballo co obxectivo de rearmarse e de demostrar ás autoridades europeas que o sector ten futuro. Neste sentido, animou a manter a liña de colaboración dos últimos anos para acadar bos resultados e garantir a sustentabilidade dos recursos pesqueiros e do propio sector. Un obxectivo no que, dixo, non escatimará esforzos tratando de facer ver ás institucións comunitarias que na xestión pesqueira é fundamental ter en conta tanto os aspectos medioambientais como os económicos e sociais.