Última hora: Evacuado por unha indisposición o capitán do buque ruso Sevmorput. “Entre o domingo e o luns pasará por Fisterra o cargueiro nuclear”. Antón Luaces

Última hora: Evacuado por unha indisposición o capitán do buque ruso Sevmorput. A evacuación foi realizada por Salvamento Marítimo. O mando do buque pasa ao dispor do primeiro oficial do mesmo.

A últimas horas deste mércores, o cargueiro nuclear ruso Sevmorput superara o norte da illa canaria de Lanzarote no seu roteiro ao porto ruso de San Petersburgo. Navega a unha velocidade media de 10,5 nós, pouco máis da metade que lle permite o reactor nuclear KLT-40, de 135 MW, que lle propulsa a 20,8 nós. O buque é do tipo LASH portacontedores, aínda que nas súas seis adegas de carga pode transportar calquera tipo de mercadoría, entre esta gran, como fai habitualmente.
O Sevmorput regresa ao porto do que partira o pasado mes de outubro con carga xeral destinada na Antártida a unha base de investigación científica da mesma nacionalidade que a do cargueiro de 38.226 toneladas de rexistro bruto. Ademais da súa carga, o navío leva a bordo 98 tripulantes, e non consta que notificase a existencia de anormalidades ou incidente nuclear. Oficialmente o Sevmorput sufriu en augas angoleñas unha avaría que afectou a unha das pas da súa hélice. Mal que ben, tal avaría foi emendada por un equipo de especialistas desprazados de San Petersburgo á capital de Angola, Luanda. A “recuperación” da hélice non permite con todo que o buque navegue á súa velocidade de cruceiro. Todo fai pensar, segundo o testemuño recolleito a un veterano xefe de máquinas galego que algunhas aspas desa hélice (probablemente máis dunha)/dunha) áchase dobrado ao chocar cun contedor semihundido ou algún outro obxecto de duro material non detectado pola tripulación do cargueiro nuclear. Dobrada ou partida a ou as pas, é probable que a solución lograda polos especialistas non fose outra que a soldadura aplicada ás mesmas de anacos de bronce. Coa curvatura debida, esas pas soldadas permiten unha navegación ata certo punto normalizada, pero que non logra alcanzar a velocidade que o Sevmorput acreditou.
Sexa como for, este veterano xefe de máquinas, experimentado como tal en distintos buques nacionais e estranxeiros, considera que a citada avaría nas pas non implica máis perigo que a circunstancia xa apuntada dunha redución notable na velocidade de desprazamento do navío, que é o que ocorreu. En canto á utilización da enerxía nuclear como medio de propulsión, o citado xefe de máquinas -actualmente xubilado- considera que non presupón perigo en si mesmo. “Pola costa de Galicia -dixo- navegan moitos submarinos e portaavións nucleares rusos, ingleses, norteamericanos e franceses, e ninguén di nada”.
Con esa media de velocidade e se non ocorre ningún imprevisto, o cargueiro nuclear ruso alcanzará a posición de Fisterra entre o domingo e o luns próximos, para situarse no seu destino -San Petersburgo- o último día deste mes e ano: 31 de decembro de 2020.
​A Dirección Xeral da Mariña Mercante Española, dependente do Ministerio de Fomento, supervisa a navegación do Sevmorput, coa esperanza de que non sexa necesaria a súa intervención en ningún momento. Tampouco ninguén se manifestou ata o momento actual no sentido dunha hipotética petición de auxilio que, en todo caso, ninguén confirmou que se puidese prestar en España.