O Concello de Porto do Son vén de informar da apertura das novas dependencias dos Servizos Sociais e Orientación Laboral, emprazadas no Consistorio, tras unha reforma integral do segundo andar do dito inmóbel.
Con este proxecto de posta a punto, informa o Concello, logrouse “crear un espazo moito máis cálido e integrador, contando con cinco novos despachos, unha sala de reunións e aseos adaptados”. O obxectivo das obras, que tiveron unha contía de 60.000 euros, foi “mellorar de xeito substancial o servizo ofrecido aos usuarios da área de Servizos Sociais e Emprego”, explicaron fontes do Goberno local, lembrando que neste mesmo espazo tiñan a súa sede de operacións até datas recentes os axentes da Garda Civil.
O obxectivo do Goberno local é estender as obras de remodelación ao primeiro andar do edificio, en datas vindeiras, co fin de dar acubillo a unhas novas oficinas de atención e servizo para a veciñanza.
