O SERGAS permite saltarse os perímetros municipais desde mañá e ata o fin do Día de Nadal. Con todo, esta tregua de Noiteboa aínda non está confirmada para Fin de Ano, depende de como evolucionen as cifras de aquí ao luns 28.
As restricións de mobilidade que afectan a varios municipios de Galicia, entre eles, as principais cidades, suprimiranse de forma excepcional entre as 0,00 horas do 23 de decembro e as 23,00 horas do 25 de decembro, para permitir os encontros familiares en Noiteboa e Nadal.
Así o confirmou o conselleiro de Sanidade, Julio García Comesaña, nunha rolda de prensa celebrada este martes para dar conta dos asuntos tratados no comité clínico que analiza a situación da pandemia de COVID en Galicia, e para informar dos “axustes” do plan de Nadal.
O conselleiro insistiu en que esta “xanela” de mobilidade abrirase de forma “excepcional”, e as restricións restableceranse desde as 23,00 horas do 25 de decembro ata, “polo menos”, as 0,00 horas do día 29 de decembro.
