A USC, o Museo de Artes e o Concello de Ribeira organizan a mostra Á procura da luz de Yolanda Carbajales

A Universidade de Santiago de Compostela, en colaboración coa Fundación Museo de Artes do Gravado á Estampa Dixital e o Concello de Ribeira, vai organizar os días vindeiros a exposición Á procura da luz, da artista Yolanda Carbajales. A mostra poderá verse entre o 23 de decembro de 2020 e o 20 de febreiro de 2021. Estará emprazada no Salón Nobre do Pazo de Fonseca (USC). A inauguración celebrarase o mércores 23 ás 20.00 horas.

Yolanda Carbajales é unha artista viguesa de adopción, nada en Venezuela, que ofrece en Á procura da luz unha engaiolante viaxe ás técnicas do gravado (gravado á maneira negra e ao fume) que foron inventadas no século XVII polo alemán Von Siegen e que destacan por brindar transicións de claroscuros con delicadeza e precisión fotográfica en branco e negro. Son técnicas moi empregadas no retrato ao óleo e a copia de pinturas ata o s. XIX.