A axenda boirense de Nadal pon o punto de mira na cultura e no comercio local

As Concellarías de Cultura e Comercio de Boiro avanzaron este mércores 2 de decembro unha manchea de detalles sobre a programación de Nadal das semanas vindeiras, unha axenda de actividades e propostas centradas (principalmente) na cultura, no lecer da rapazada e, tamén, na reivindicación do comercio local. O programa foi dado a coñecer pola edil de Cultura, María Outeiral, e o responsábel de Comercio, Marcos Fajardo, xunto con Daniel García, presidente da Asociación Boirense de Empresarios (ABE), e os técnicos e técnicas dos ditos departamentos. Entre o completo feixe de propostas salienta unha iniciativa de Escape Room polos comercios do municipio.

Quen queira participar poderá facelo botando man dunha aplicación móbil e desprazándose polo polos establecementos de Boiro na procura de pistas nos escaparates e resolvendo preguntas de interese cultural para poder avanzar no xogo.

Os concelleiros explicaron que xa hai mais de 20 comercios inscritos para ter presenza activa na actividade de Escape Room, e lembraron que “todos aqueles que queiran participar poden facelo poñéndose en contacto do departamento de Cultura”.

Amais, a Asociación Boirense de Empresarios organiza nestas datas unha campaña de promoción empresarial coa entrega de rascas con 3.200 premios directos (paraugas, cuncas, bolsas…) que a cidadanía obterá facendo as compras nos comercios asociados e que concluirá co sorteo final do Sueldazo ABE de 300 euros durante 6 meses. A entidade impulsou tamén para as vindeiras datas festivas o Bono Regalo ABE, unha caixa-agasallo que se pode mercar co importe que se desexe para utilizar en preto de 200 establecementos de Boiro.

O concelleiro de Comercio, Marcos Fajardo, quixo destacar a importancia que as pequenas empresas e o comercio local teñen no desenvolvemento económico de Boiro: “Dende o Concello apostamos sempre pola promoción do comercio local e este Nadal, mais que nunca, quixemos crear sinerxías entre cultura e comercio e organizar actividades conxuntas para darlles apoio”, afirmou o concelleiro.

A Carpa dos Soños como eixe das actividades

O programa de actividades culturais está centralizado na Carpa dos Soños que, como o ano pasado, estará situada na praza de Galicia. Entre as actividades destacan os espectáculos pensados para os mais cativos.

O martes 22 de decembro, as 19.00 horas, estará A Apalpadora de Iseo A Moura, o mércores 23 o Mago Teto con Pequenas grandes maxias en dúas funcións, as 18.00 e as 19.30 horas. O espectáculo de clown Circanelo será o domingo 27 as 18.30 horas e o luns 28 Un mundo mellor un contacontos de Raquel Queizás as 18.00 e as 19.30 horas.

O mércores 30 Oholimpiadas de Sincronacidas as 19.00 horas, o domingo dia 3 de xaneiro Extra de Paco Nogueiras, as 18.00 e as 19.30 horas e o luns dia 4, as 19.00 horas, Hell Brothers de Cirkompacto.

A concelleira de Cultura, María Outeiral, fixo un chamamento a toda a veciñanza para apelar “a responsabilidade individual de cada cidadán e cumprir coas medidas de seguridade en todas as actividades”. E engadiu: “A cidadanía tivo un comportamento exemplar durante o verán e o outono e queremos que así siga sendo durante o Nadal”. Tamén advertiu que as actividades programadas poden sufrir cancelacións ou modificacións a expensas da situación epidemiolóxica.

Ademais dos espectáculos para as cativas e cativos, a programación inclúe tamén actuacións con grupos locais, concertos e alboradas coincidindo coas festas de inverno, organizadas xunto coa Comisión de Festas de Santa Baia, e que se van celebrar entre o 10 e o 14 de decembro. Este ano vaise montar tamén o mercado de Nadal Factoría das Raíñas, que muda de localización e vaise instalar na Carpa dos Soños.