Pecha a hostalería en 60 concellos galegos con endurecemento de medidas

04 Novembro 2020

A Xunta de Galicia poñerá en marcha desde as 15.00 horas do próximo venres un endurecemento de medidas en 60 municipios da comunidade, o 60% da poboación, coa intención de rebaixar a presión asistencial nos hospitais galegos que está a causar o virus e evitar, máis adiante, un confinamento domiciliario. As medidas estarán en vigor durante un mes e entre elas destaca o peche nestes concellos da hostalería, que só poderá manter aberto servizo a domicilio. O presidente da Xunta, Alberto Núñez Feijóo, xa anunciou a posta en marcha de medidas de rescate inminentes para o sector.

Os concellos afectados por estas restricións son: A Coruña, Arteixo, Culleredo, Cambre, Oleiros, Ferrol, Ares, Fene, Neda, Narón e Mugardos, Santiago, Ames, Boqueixón, Oroso, O Pino, Teo, Trazo, Val do Dubra e Vedra. Súmanse tamén Lugo, Ourense, Barbadás, Amoeiro, Coles, Pereiro de Aguiar, San Cibrao das Viñas e Toén, ademais de Pontevedra, Vilaboa, Pontecaldelas, Poio, Marín, Barro, Campolameiro, Cerdedo-Cotobade e Soutomaior. Ademais de Vigo, tamén se verán afectados polas novas restricións os concellos de Mos, Nigrán, Gondomar, Porriño e Redondela.

Debido á súa incidencia, o comité clínico da Xunta tamén optou por estender as novas limitacións sociais a Vimianzo, Monforte, Burela, Viveiro, O Carballiño, Verín, Xinzo, Cangas, A Estrada, Lalín, Silleda, Ponteareas, Tui, Cambados, O Grove, Vilanova de Arousa e Vilagarcía.
Coas normas restrínxense todas as actividades non esenciais. O presidente galego indicou que nas próximas horas aclararase de forma máis específica que negocios veranse afectados, aínda que, de momento, o comercio mantense aberto. Nos centros comerciais os aforos nas zonas comúns reduciranse a un terzo, aínda que no interior das tendas manterase a limitación ao 50%.

Nos 60 concellos e durante un mes decrétase o peche tanto de bares como de restaurantes que só poderán abrir para servizo a domicilio.

Aínda que se pon en marcha un peche perimetral destes concellos, seguirán permitidos os movementos laborais, educativos, de coidados e sanitarios. A este respecto, o presidente galego anunciou que o Diario Oficial de Galicia (DOG) dará información sobre os requisitos e documentos que deben levar encima aqueles cidadáns que realicen labores de asistencia a familiares.

A práctica deportiva será só de carácter individual.

As restricións impactan tamén de forma notable no ámbito cultural. Tanto cinemas como teatros e auditorios reducirán o seu aforo a 30 persoas no interior e a 75 no exterior.

Doutra banda, o Goberno galego tamén determinou a necesidade de reducir o transporte público non escolar. O aforo queda limitado ao 50% dos seus asentos e ao 25% de pé

Outros artigos

Publicidade

Revista en papel

Opinión

“Cando existen intereses contrapostos na pesca”. Antón Luaces

“Cando existen intereses contrapostos na pesca”. Antón Luaces

Dicirmos que hai diverxencia entre o sector pesqueiro e os gobernos (autonómico e/ou central) non é descubrir, arestora, o Atlántico. Resulta tan evidente ese desencontro, que só a desunión permanente no eido da pesca marítima explica que o sector, en Galicia e as...