A Consellería de Emprego e Igualdade da Xunta de Galicia vai financiar o Obradoiro de Emprego Tahume VI, que se realizará conxuntamente entre os Concellos de Porto do Son e Ribeira e no que se impartirán durante 9 meses as especialidades de Traballos de carpintería e moble e Actividades auxiliares en conservación e mellora de montes. A subvención conta con 346.946,00€ para os devanditos obxectivos de formación e empregabilidade e 9.000€ para incentivos á contratación.
A sexta convocatoria do obradoiro recibiu un importante impulso a comezos de ano, coa formalización do convenio de colaboración asinado polos ditos Concellos, unha rúbrica que veu acompañada da solicitude dunha axuda para dar as máximas amplitude e repercusión á iniciativa conxuntade formación e empregabilidade, axuda confirmada finalmente. “Trátase”, sinalaron daquela os rexedores, “dunha oportunidade de aprendizaxe, facilitar a empregabilidade e redundar no beneficio dos municipios”.
A formación do obradoiro estenderase ao longo de nove meses e contará con vinte participantes, dez por municipio.
En Ribeira, os traballos da modalidade forestal concentraranse principalmente en Couso e o monte de San Alberte, a través da repoboación con especies autóctonas; mentres que a especialidade da carpintería desenvolverá o proxecto de recuperación de pasarelas nos areais ou a elaboración de pasamáns para a praia da Corna.
No caso de Porto do Son, a carpintería permitirá repasar moitas das pasarelas que se distribúen ao longo dos seus quilómetros de litoral, así como a construción de mobiliario urbano como por exemplo bancos ou macetas, entre outros.
