O Noia Portus Apostoli tivo que agardar á recta final para lograr bater ó Leganés FS por 2-3. Un conxunto “pepinero” que mostrou unha cara moi competitiva e que obrigou ó cadro de Marlon Velasco a sufrir ata o final. O conxunto madrileño debutaba como local, pola súa contra, o Noia FS viña cun pleno de vitorias na competición.
O partido comezou cun ritmo baixo, con medo a cometer un erro que terminara costando caro. Froito disto, o partido careceu dun dominador claro nos primeiros compases, ata que Pope, no minuto 7, logrou bater a Tarsa cun disparo entre as pernas para poñer ó Noia por diante no marcador. A partir dese intre, o partido gañou ritmo e intensidade e as ocasións sucederíanse por ambos bandos. A máis clara para o Leganés, co lanzamento dun dobre penalti que parou Álex Pérez para irse ó tempo de lecer coa vitoria visitante.
Co inicio do segundo período, o conxunto local impuxo o seu xogo nos primeiros intres, pero sería o cadro dirixido por Marlon Velasco o que terminou impoñéndose. Así, Javi Rángel , no minuto 5, puxo terra de por medio ó remachar unha bonita xogada combinativa do equipo visitante que supuxo o 0-2. A partir de aí comezou o asedio “pepinero”.
Co resultado en contra, e sen nada que perder, o Leganés FS acantoou ó Noia FS no último tramo do encontro. En consecuencia disto, Chicho conseguiu recortar distancias trala saída dun córner, 1-2, minuto 29. Quedaban once minutos e os nervios fixéronse presentes nos noieses, que comezaron a cometer erros e defender moi atrás. Un fallo na saída de balón provocou que Chicho puxera as táboas no marcador a falta de catro minutos para finalizar o encontro.
Nestas situacións é onde se demostra a mentalidade dun equipo, e Marlon Velasco deixouno moi claro, sacou o porteiro-xogador e saíu a polo partido. A valentía do Noia FS veríase recompensada no 38’, cando Antonio Diz (porteiro-xogador) definira ante Tarsa para lograr o definitivo 2-3.
Con este triunfo, O Noia Portus Apostoli FS segue liderando a Segunda División con 15 puntos de 15 posibles. O cadro de Marlon Velasco terá agora que tratar de seguir coa boa dinámica nos dezaseisavos da Copa do Rei, onde se enfrontará ó Parrulo FS.
