O Concello de Ribeira vén de dar luz verde ao abono das axudas para a reactivación económica do comercio e a hostalería local afectados polo COVID-19. Fíxoo logo de que a comisión avaliadora finalizase coa tramitación necesaria para a súa entrega. En virtude desta resolución, van ser 117 as empresas que recibirán de contado estas axudas, con contías que nalgún caso chegan aos 2.500 euros. Quedan pendentes de resolución as que aínda non presentaron a documentación requirida.
O Concello lembra que está en fase de presentación de solicitudes unha nova convocatoria de PEL Reactiva (Deputación) por importe de 595.528,68 euros, destinados a persoas autónomas e microempresas afectadas pola pandemia e que son compatíbeis con calquera outra concedida por entidades públicas ou persoais, ata un máximo de 40.000 euros. Hai de prazo ata as 14 horas do día 25 de novembro de 2020 para solicitalas.
As bases desta nova convocatoria poden ser consultadas na páxina web municipal.