O Concello de Lousame vai rematar en breve as obras de reforma integral da Piscina Municipal. A alcaldesa da localidade, Teresa Villaverde, afirma que “os traballos están practicamente acabados, a falta dunhas pequenas actuacións no vaso da piscina”.
As obras están incluídas no Plan Complementario do Plan Único 2019 e supuxeron a demolición e reposición do antigo pavimento e do muro do peche da praia. Estas comezaron no mes de xuño e nelas invertéronse 114.500 euros. A empresa Jstop Obras y Servicios SL. foi a encargada da reforma e realizou diferentes labores como a impermeabilización do vaso da piscina ou a colocación dunha nova electrobomba centrífuga.
O Concello explica que “debido a gran ampliación realizada na zona da praia, van a proceder facer un portal e acondicionar un novo peche perimetral”. Segundo informa a alcaldesa, “a ampliación da zona de praia é, quizais, a maior novidade coa que se atoparán os veciños e veciñas a primeira vista, así como as melloras na zona das duchas e mesmo na carpintería interior dos vestiarios. Pero durante os últimos meses tamén impermeabilizamos o vaso da piscina, para evitar fugas de auga, e importantes reparacións na sala de máquinas que redundarán nun mellor servizo aos veciños e veciñas de Lousame”.
