O Concello de Boiro solicita un cribado masivo para detectar posíbeis casos asintomáticos

O Concello de Boiro, a través da xuntanza semana da Comisión de Seguimento da Evolución da COVID-19, decidiu tomar unha serie de medidas preventivas para frear o número de contaxios. Por exemplo: solicitar ao SERGAS que se realice un cribado masivo de probas PCR para detectar posíbeis casos asintomáticos.

A decisión ten a súa orixe na entrada do concello no nivel 3 de alerta, o pasado martes, polo relevante número de casos positivos, unha cifra que, segundo dixo o Concello, semella que non deixa de medrar de xeito exponencial, polo que a Comisión decidiu solicitar ao Servizo Galego de Saúde que se realice a devandita proba masiva. O obxectivo desta solicitude é “evitar que se produza un importante golpe económico e social no tecido industrial e nas persoas e familias que dependen directamente do mesmo”.

Dende a Policía Local de Boiro solicitouse tamén a colaboración da Policía Autonómica para intensificar o control e vixilancia sobre a poboación no cumprimento das restricións e medidas de seguridade.

O Concello de Boiro acompañou estas medidas dun chamamento á veciñanza para que” extreme as precaucións e cumpra coas medidas de seguridade como son o uso obrigatorio de máscaras, a distancia social e evitar as aglomeracións”.