O equipo dirixido por Marlon Velasco recibe este sábado ao Rivas Futsal, coa intención de conseguir a súa cuarta vitoria consecutiva e manter a cabeza da táboa. Despois dun inicio de liga impecable, o equipo noiés volve ao Agustín Mourís tras dúas xornadas como vístante, para tentar repetir o resultado da tempada pasada, na que venceron 4-3 ó Rivas Futsal.
Un Noia que ven de lograr o que é o seu mellor arranque na súa historia na Segunda División fronte ó Rivas Futsal, que conta cunha vitoria e unha derrota os seus dous encontros xogados ata o de agora. O cadro de Rivas-Vaciamadrid gañou na primeira xornada á Unión África Ceutí (5-4) e saíu derrotado no enfrontamento ante o Móstoles (1-6).
O partido servirá para que Álex Pérez siga collendo sensacións tras o seu regreso de lesión o pasado fin de semana fronte ó Benavente: “Pouco a pouco comecei a entrar no partido e agora toca seguir mellorando para volver a estar ao 100%”, afirmou o xogador do Noia. Ademais, Palmas, Javaloy e Lluc estrearanse como capitáns oficiais nesta campaña 2020/2021.
O partido disputarase mañá sábado 14 ás 18.30 no Municipal Augustín Mourís e acollerá a un máximo de 60 persoas por mor do aforo limitado dada a situación pola COVID-19. As entradas foron sorteadas entre os abonados do equipo noiés. Ademais, o encontro será emitido en streaming por Youtube dende a canle do Noia Portus Apostoli FS.
