O Concello de Noia, en colaboración coa Xunta de Galicia e a Deputación da Coruña, vén de facer balance do traballo que se está a desenvolver en diferentes recantos do núcleo urbano para mellorar o tránsito, a mobilidade e a seguridade nas estradas. Parte dos traballos focalizáronse no peirao de Cadarso, que foi obxecto dunha posta a punto integral (melloras no pavimentado, no pintado e na sinalización). O malecón abriuse este mércores 25 de novembro con sentido duplo de circulación.
Amais os traballos recentes abranguen tamén República Arxentina, onde comezaron esta semana as obras que teñen como obxectivo principal a mellora e o reforzo do firme existente, coa pavimentado do mesmo, o pintado e a sinalización horizontal así como a mellora na accesibilidade para os peóns. Estas obras de mellora supoñen un investimento de máis de 120.000 euros financiados con fondos do Concello de Noia, a Xunta de Galicia e a Deputación da Coruña.
