Este mércores 25, iniciáronse na escola de educación infantil da Angustia as obras de mellora e acondicionamento das aulas situadas na planta baixa. Ata o lugar desprazáronse este mesmo mediodía o alcalde Xosé Lois Piñeiro e a concelleira da Educación, Genoveva Hermo.
A edil expuxo que a dita actuación consiste na colocación de illamento térmico do perímetro da edificación e tradosado con cartón-xeso, renovación da carpintería interior, nova instalación eléctrica e colocación de vinilo no chan. En consecuencia, afirmou que se “mellorará sensiblemente o edificio en xeral e a vida dos escolares en particular.” A obra foi adxudicada á empresa CYS Hispania S.L. e o importe ascende a 22.660’90 euros (cunha rebaixa de 2.732’32 euros sobre o prezo de licitación) con cargo aos orzamentos municipais. O prazo de execución é dun mes e medio.
Pola súa parte, o rexedor lembrou que o edificio tamén acolle o centro social no primeiro andar, adecuándose o espazo para o desenvolvemento das aulas para os 12 escolares. Tamén fixo fincapé nas inversións feitas nas escolas nos últimos anos, precisando que “esta vén a ser unha máis que vai a completar toda unha actuación neste centro” e engadiu que, despois das obras, “vai quedar perfectamente dotada.”
