O auditorio da Casa da Cultura de Lousame acollerá este domingo 9 de novembro, en dúas quendas, o espectáculo Ópera Break´s, un show especialmente dirixido para un público xuvenil e que salienta por mesturar ópera, breakdance e DJ nunha única proposta. A actividade, que se achega á veciñanza ás 17.30 e ás 19.00 horas, vén da man da soprano local Esperanza Mara (Emanarte) e de tres artistas urbanos do colectivo Vella Escola: DJ Mil e dos bailaríns Bboy Serlli e Pol Rock, coa colaboración especial doutros profesionais do mundo do Beatbox e do Graffiti.
A asistencia é totalmente de balde, se ben o aforo é limitado debido á aplicación dos protocolos preventivos fronte á COVID-19. Os veciños e veciñas que desexen asistir poden reservar a súa entrada chamando á Casa da Cultura (981 825 780).
O Concello fixo saber que a día de hoxe (este luns 2 de novembro) xa están máis da metade das prazas cubertas.
O espectáculo Ópera Break´s ten unha duración aproximada de unha hora na que, a través da expresión musical e corporal, cóntase, en palabras dos seus artífices, “unha historia que rompe as barreiras do clásico e do urbano, fusionando ambos conceptos nun espectáculo multidisciplinar e sorprendente”.
O espectáculo mestura dun xénero como a ópera, ligado por tradición ás elites sociais e aos espazos pechados dos teatros, coa cultura urbana, dirixida á mocidade, transgresora e libre de normas.
