FUNDAMAR, a Fundación para a Pesca e o Marisqueo, publicou un recurso de consulta para impulsar a presenza de persoas con diversidades funcionais nos sectores que representa a dita entidade. A Guía para o fomento da empregabilidade de persoas con discapacidade será unha ferramenta da que poden botar man as entidades da economía social e as empresas do sector pesqueiro que teñan obriga de cumprir coa cota de reserva (onde o 2% dos postos deben ser ocupados por estes colectivos).
O obxectivo da guía é, en definitiva, “contribuír á contratación de persoas con dificultades de inserción laboral” e “servir de apoio nos procesos des selección”.
FUNDAMAR realizou este traballo ao abeiro da súa Estratexia para a promoción da economía social no ámbito da pesca industrial, iniciativa que conta co apoio da Rede Eusumo, impulsada pola Xunta de Galicia, e que xa tivo como resultado, entre outros, a Guía de oportunidades para a promoción do emprego no marco da economía social no sector e a creación do Observatorio da economía social no sector pesqueiro.
As persoas interesadas en contar cun exemplar en papel da guía poden solicitalo a través do correo fundamar@fundamar.org ou, se o prefiren, pódena descargar en formato dixital (PDF) a través dunha ligazón específica.
