Unha muller resultou ferida esta tarde ao caer nunha zona rochosa próxima á Praia de Tanxil. Segundo a información facilitada ao 112 Galicia polos servizos de emerxencia desprazados, a muller atopábase pescando cando caeu entre as pedras da escollera de Rianxo.
O 112 Galicia tivo coñecemento do ocorrido ás 17:20 horas, a través dos Bombeiros de Boiro. Indicaban que os servizos sanitarios estaban no lugar dos feitos e solicitaban medios para liberar á muller das pedras.
A partir de aí, o persoal do Centro Integrado de Atención ás Emerxencias 112 Galicia informou do acontecido á Policía Local e á Agrupación de Voluntarios de Protección Civil da localidade.
Segundo puido saber Emerxencias 112 Galicia, os membros do Servizo de Prevención, Extinción de Incendios e Salvamento de Boiro empregaron unha padiola de rescate para desprazar á muller ferida ata a ambulancia, na que foi finalmente trasladada ao centro médico de referencia.
