O Concello de Ribeira informa do inicio dunha nova intervención arqueolóxica no Castro da Cidá consistente na escavación e posta en valor da muralla do recinto superior. “Trátase da terceira actuación que se vai efectuar sobre este milenario asentamento fortificado emprazado no cumio do monte da Cidá e que tantos interesantes descubrimentos está propiciando”, fixo saber o Concello, salientado o feito de que os novos traballos poñen o foco nun terraplén rematado en parapeto que circunda a plataforma superior ou croa do castro e que está situado na contorna máis próxima ás cabanas.
Trátase dun espazo de aproximadamente 304 metros cadrados, cunha lonxitude aproximada de 53 metros e entre 5 e 6 metros de anchura.
Ademais da escavación propiamente dita, a actuación inclúe a restauración e consolidación desta área (ao longo desta semana estase a rozar a zona de actuación) así como a divulgación e posta en valor da intervención.
Os traballos teñen unha duración de dous meses e están sendo desenvolvidos pola empresa Terra Arqueos, S.L. Comportan un investimento de 177.386 euros, IVE incluído, co-financiados pola Axencia Galega de Desenvolvemento Rural da Consellería do Medio Rural da Xunta de Galicia, segundo a resolución sobre a concesión dunha subvención ao abeiro da medida LEADER do PDR de Galicia 2014-2020 que xestiona a asociación Deloa.
Antecedentes
As primeiras escavacións desenvolvidas en Castro da Cidá tiveron lugar entre abril e outubro de 2014 ao abeiro do primeiro proxecto Ribeira Atlántica, que estivo co-financiado con fondos europeos FEDER. Estes labores, explica o Concello, “partiron dun descoñecemento case total do que había soterrado e foron quen de sacar á luz restos dun castro en moi bo estado detectando 15 cabanas vinculadas á Idade de Ferro e unha caseta-vixía adscrita ao século XVIII”.
En datas similares do 2015 levouse a cabo unha segunda fase, desta vez sufragada con fondos LEADER xestionados por Deloa e puxo de manifesto outras sete cabanas de granito das que se consolidaron cinco, amén de pequenos muros segmentados e a presenza de indicios da muralla-parapeto obxecto da presente intervención.
