A Garda Civil detivo a un veciño de 41 anos natural de Ribeira, como presunto autor dos delitos de roubo, furto de uso de vehículo e falsidade documental, tras subtraer un coche dun concesionario e poñerlle placas de matrícula falsas.
O conductor foi interceptado nun control de verificación de drogas e alcol na PO-548, en Vilagarcía de Arousa. Os axentes pararon a este condutor e, ao solicitarlle a documentación do vehículo dixo carecer dela.
Ao comprobar o número de bastidor, os axentes constataron que o coche non estaba matriculado e figuraba como roubado nun concesionario de Vilagarcía. O vehículo levaba placas de matrícula que se correspondían con outro coche, da mesma marca e modelo, cuxo titular reside en Badalona. O condutor foi detido como presunto autor dos delitos de roubo, furto de uso de vehículo e falsidade documental. O detido e as dilixencias practicadas foron postos ao dispor do xulgado de garda de Vilagarcía.
