O Concello de Ribeira informa de que xa están en marcha as obras para ceibar de obstáculos o miradoiro de Pedra da Ra e poñelo a punto e materia de accesibilidade, posibilitando a súa visita e desfrute para todo tipo de colectivos. Este proxecto foi elaborado por Carlos Seoane, o mesmo arquitecto que se encargou no 2016 da remodelación da dita contorna nunha actuación que, segundo lembra o Concello, foi obxecto de múltiples recoñecementos como os premios COAG, FAD ou Enor ou a súa selección para as bienais de arquitectura de Venecia e Arxentina, entre outros.
Amais das sendas de acceso existentes crearanse outras novas para permitir o tránsito de persoas con mobilidade reducida, unha das cales conducirá até o icónico piñeiro situado nas inmediacións, que, segundo recorda o Goberno de Ribeira, ofrece magníficas vistas cara ao Parque Natural de Corrubedo. Ademais, crearanse dúas prazas de aparcamento adaptadas a persoas con diversidades funcionais.
A actuación está sendo executada por Sonense de Granitos, S.L. e comporta un investimento de 47.795 euros. Están co-financiadas pola Consellería de Cultura e Turismo da Xunta.
