Até quince mozas e mozos emprenderon este luns 16 de novembro a súa andaina formativo-gastronómica ao abeiro da segunda edición do obradoiro de emprego O Pote de Ribeira. Hoxe presentáronse os detalles da segunda convocatoria da actividade, que terá unha duración de nove meses e que incluirán múltiples actividades prácticas do ámbito culinario e da hostalería. O Pote II arrincou tan só catro días despois do peche de O Pote I.
As propias instalacións da Escola Municipal de Hostalería situadas no segundo andar do mercado deron cabida á apertura deste taller nun acto que contou coa presenza do delegado territorial da Xunta, Gonzalo Trenor; do alcalde de Ribeira Manuel Ruiz; e do concelleiro de Promoción Económica, Ramón Doval.
O alumnado, formado por persoas mozas de entre 18 e 29 anos incluídas no sistema nacional de garantía xuvenil (dez homes e cinco mulleres), levará a cabo ao longo do curso distintas iniciativas tales como demostracións (showcookings), eventos gastronómicos ou elaboración de menús degustacións, así como almorzos solidarios, destinado a persoas usuarias da UAD e Servizos Sociais.
O Pote II contará cunha nova docente, Patricia Martínez, en tanto que Almudena Basoco repite como directora do obradoiro logo de levarse a cabo o proceso selectivo.
O alcalde Manuel Ruiz salientou o feito de que Ribeira “vén sendo obxecto recorrente da celebración de obradoiros de emprego co-financiados pola Xunta”, xa que a O Pote II sumarase en breve (a mediados de decembro) un novo taller co-organizado con Porto do Son coas especialidades de carpintería e conservación de montes. Amais, animou aos asistentes a aproveitar a oportunidade: un desexo compartido por Gonzalo Trenor, quen subliñou o alto grao de inserción laboral que teñen os obradoiros promovidos pola administración autonómica.
