Este venres 13 de novembro o Centro Cultural Lustre Lustres Rivas dará cabida a unha mostra do artista afincando en Ribeira Carlos José Barbieri. A exposición, baixo o título Un arxentino en Galicia, será inaugurada ás 20.00 horas no centro cultural ribeirense. Reúne 43 óleos e acuarelas de variados motivos e temas, dende costumismo galego (hórreos, mariñas, igrexas, paisaxes) ata temática taurina ou de polo (cabalos, cans, touros).
A exposición terá un horario de luns a venres de 10 a 14 e de 19 a 21 h e os sábados de 11 a 14 horas. A entrada é libre é gratuíta e ten un aforo máximo de 5 persoas a un tempo, tamén se permitirán visitas guiadas para grupos de 5 persoas previa reserva (normativa COVID19). Poderá ser visitada ata o 12 de decembro.
O artista
Residente en Ribeira na actualidade, Barbieri naceu en Bos Aires en 1960 e conta cunha longa traxectoria vinculada ao arte con numerosas exposicións colectivas e individuais en Arxentina e España con técnicas como óleo, acuarela ou lapis. Está especializado na temática do polo sendo pioneiro en pintar cabalos e expoñendo en certames nacionais e creando a marca POLOARTE que reuniu aos mellores pintores, ourives e escultores neste eido. Tamén foi creador da Guía del Polo; impartiu clases de debuxo e pintura en Pilar (Bos Aires) e Santa María Polo en Sotogrande (Cádiz).
O acto inaugural estará presidido polo alcalde de Ribeira, Manuel Ruiz Rivas, e a concelleira de Cultura, María José Sampedro Fernández acompañados do programador de exposicións, Unai González Suárez e o propio artista. O acto ten un aforo limitado a 40 persoas previa inscrición no correo culturaefestexos@ribeira.gal ou no teléfono 981 835650 ata o venres 13 ás 14 horas.
Ampliación no museo
Por outra banda, cómpre informar de que a exposición Unha familia de Ana Crujeiras que se está a exhibir na Sala Museo Municipal de Ribeira (que finalizaba este martes 10 de novembro) amplíase ata o 30 de novembro.
