A agrupación cidadá Boiro Novo, a través da concelleira Dores Torrado, vén de anunciar unha moción para esixir o cumprimento das obras pendentes en Sandrenzo e Fontecoba, onde, segundo apunta a asemblea cidadá, a veciñanza leva anos agardando para que se execute un convenio asinado na lexislatura 1999-2003, polo que a comunidade de montes debía ceder unha parte do seu terreo ao Concello para a construción da primeira fase do Polígono Industrial a cambio de que a Administración local acometera investimentos públicos no lugar.
Boiro Novo lembra que “algúns destes investimentos aínda non están hoxe executados”, como é “o caso dun parque infantil, unha pista polideportiva e máis a construción dun pequeno local social para reunirse a veciñanza”. A plataforma opina que “o Concello incumpriu este acordo”, e recorda que os residentes dos ditos núcleos víronse na obriga de reclamar a execución destas actuacións pola vía xudicial, emitíndose unha sentenza favorábel á ela no ano 2015.
“Malia isto”, engade Boiro Novo, “estas actuacións levan sen rematar dende hai máis de dous anos, polo que a xente está farta de ter que acudir á xustiza para facer valer os seus dereitos diante do Concello de Boiro”.
Por todo o devandito, agrupación solicita que “coa maior brevidade posíbel” o Goberno local execute as obras e actuacións pendentes de realizar no lugar como o peche perimetral, a colocación do chan do parque infantil e a construción do local social para celebrar xuntanzas veciñais, entre outras iniciativas.
