A Banda Municipal de Música de Boiro organiza este sábado o concerto
de Santa Icía 2020 en homenaxe ao mestre Xosé España, falecido no mes de
marzo. O acto vai mesturar as pezas do mestre con imaxes para afondar na
súa figura, a proxección dun documental sobre a súa figura e unha homenaxe á familia.
D. Xosé R. España Lorenzo foi creador de numerosas bandas de música
como a de Negreira, Mazaricos, Ordes, Santa Comba, Taragoña ou Boiro, así
como de grupos de música tradicional, como os Menestreis, e foi mestre de
música de infinidade de rapaces e rapazas. Faleceu o pasado 24 de marzo,
polo que a Banda de Música de Boiro quere renderlle homenaxe no concerto de Santa Icía deste ano.
A actuación vai mesturar pezas do mestre España con imaxes coas que
se vai afondar na súa figura e na que vai ser lembrado por alumnos e alumnas, e colaboradores. Despois do concerto vaise proxectar un documental realizado por Jesús Ares sobre a figura do músico boirense e entregarase un libro conmemorativo que o Concello de Boiro reedita.
A actividade será este sábado, ás 19:00 horas, no salón de actos da
Casa da Cultura de Boiro. A capacidade é limitada, polo que se require a
reserva previa de entradas no enderezo electrónico reservacultura@boiro.gal
