O 25 de novembro temos unha cita coa igualdade en Rianxo, e máis aínda, con todos aqueles elementos (ideas, prexuízos, tópicos) que nos impiden vivir en igualdade, co fin de velos de fronte, coñecelos e, en última instancia, botalos abaixo. Estamos a falar da nova sesión do programa Escola de Familias, Educando nas novas masculinidades, do profesor da Universidade de Santiago Jorge García Marín. O seu relatorio xirará arredor do libro que o profesor, sociólogo e activista publicou en datas recentes coa editorial Galaxia, Papá, por que non pintas as unllas de cores?, Educando (construíndo) masculinidades disidentes. O libro, como lembraremos, foi presentado en Boiro no mes de xaneiro. A cita en Rianxo será ás 17.00 horas, no Auditorio.
Segundo avanza o autor do libro, respecto da súa intervención, as masculinidades aínda precisan construírse conforme aos novos tempos, “polo que se fai preciso, xa desde a educación infantil, abordar o modelo de home que necesitamos para esta sociedade igualitaria”.
Jorge García Marín é profesor do departamento de Socioloxía na Universidade de Santiago. Ten ás súas costas unha longa bagaxe como activista a prol das desigualdades e pechando fileiras, en colaboración coas comunidades de estudantes, arredor de todo tipo de iniciativas contra o machismo e a violencia contra as mulleres.
García Marín imparte docencia no mestrado Igualdade, xénero e educación e na actualidade é secretario do CIFEX (Centro Interdisciplinario de Investigacións Feministas e de Estudos de Xénero). Dende hai case trinta anos está vencellado a grupos de investigación en temáticas de xénero, sendo as súas liñas prioritarias, dentro dos estudos de xénero, os videoxogos, as identidades virtuais, os relatos fílmicos e as problemáticas asociadas ás masculinidades.
