A Marea de Noia celebrou estes días a loita contra as agresións machistas, ao abeiro da campaña En Negro Contra a Violencia. Segundo fixeron saber as e os integrantes da agrupación local, “a pandemia trouxo moitos problemas á poboación, e agravou moitos outros que xa viñan existindo, como por exemplo o da violencia machista, cuxas denuncias aumentaron nun 20% durante as dúas primeiras semanas do confinamento”.
A Marea de Noia tamén explicou que a campaña En Negro celebrouse desta volta sen ao apoio do Concello, malia a importante repercusión acadada en anteriores edicións. Incluíu o reparto entre a cidadanía de tapabocas negros que, por mor do mal tempo, non puideron ser distribuídos até este domingo 29. Segundo explica A Marea, o acto, celebrado a carón do edificio de Abanca, resultou “un auténtico éxito”.
Dende a Marea Cidadá de Noia anunciaron que “continuarán loitando pola erradicación da violencia machista e por un mundo no que homes e mulleres poidan finalmente vivir en igualdade”.
