A Dirección Xeral de Tráfico (DXT) desenvolverá, entre este luns e o vindeiro domingo 18, unha campaña especial que intensificará os controis de vixilancia de camións e autobuses nas estradas de Galicia.
Segundo informa a Delegación do Goberno, serán os axentes de Tráfico da Garda Civil os encargados de implantar estes dispositivos coa colaboración de numerosas policías locais da Comunidade.
Os axentes farán especial incidencia en verificar aspectos como as condicións técnicas e os elementos de seguridade do vehículo, así como o seu peso, o acondicionamento da carga, o estado dos pneumáticos ou o adecuado funcionamento da iluminación.
Tamén comprobarán no ámbito administrativo, examinando a documentación do vehículo e o permiso dos condutores, ademais dos tempos de condución e descanso, o consumo de alcol, a velocidade e o mantemento da distancia de seguridade.
