O grupo socialista de Ribeira, a través do seu voceiro José Vilas, presentou un rogo para ser debatido en pleno sobre a necesidade de incrementar a seguridade viaria na vía transversal entre a avenida Rosalía de Castro e a rúa Alcalde Fernández Bermúdez, na que o Concello cambiou o sentido da circulación con motivo da peonalización e humanización do centro da cidade. Segundo fai saber o PSdG-PSOE, a seguridade viaria das persoas que cruzan dende a beira do Concello cara a zona do Campo (rúa Fernández Bermúdez) “entra en risco, xa que moitos condutores non respectan a preferencia dos peóns”.
En virtude de todo o devandito, o grupo acordou solicitar ao Concello “que se valore a necesidade da implantar sinais verticais e horizontais de cara a realizar un paso de peóns no lugar, e facilitar a seguridade viaria”.
