A banda Os Bar Ban Sónicos, radicada en Pobra do Caramiñal e referente actual do garaxe punk da nosa terra, vén de tomar (literalmente) as redes sociais para dar a coñecer o seu primeiro disco oficial, un impecábel traballo breve co que deleitar á importante comunidade de seareiras e seareiros (unha comunidade que se fixo forte na pandemia coa música en streaming) do puxante e vivificante rock galego.
O EP de debut chámase Alimentando o nervio e podemos acceder a el a través dunha chea de canles que citamos máis abaixo. Segundo explican, é o primeiro adianto do álbum completo que agardan publicar ao principio do ano que vén. Son catro cancións gravadas en Hertzcontrol Studio en Seixas, Caminha, Portugal e producidas polos propios integrantes da banda da Pobra.
Inclúe dúas cancións propias: Que mellor amigo que ese, que xa deron a coñecer coa publicación dun vídeo a mediados de setembro, e Queres saber. A estes dous temas súmanse dúas versións de clásicos do garaxe sesenteiro, Negro gato, unha das cancións icónicas da jovem guarda brasileira e popularizada por Roberto Carlos nos seus inicios rockeiros e a outra é unha versión en galego do primeiro single dos Sonics The Wicht.
Deseguido van as ligazóns a algunhas das plataformas dixitais onde podemos escoitar o disco:
· Spotify.
· Amazon Music.
· Deezer.
· SoundCloud.
· Qobuz.
· Tidal.
