Esta fin de semana (os días 16, 17 e 18 de outubro) máis de 20 entidades da nosa terra van xuntar forzas para colaborar na novena edición da Limpeza Simultánea de Praias, impulsada pola asociación ADEGA co obxectivo de mostrar a importancia de manter o litoral (e o mar) o máis limpo posíbel de refugallos, non só para asegurar no tempo a sustentabilidade de boa parte das nosas actividades produtivas principais (pesca, marisqueo, turismo, etc) senón tamén para garantir a supervivencia do medio natural e a biodiversidade. Na actividade colectiva nos areais implicaranse novamente centros de ensino, asociacións ecoloxistas, culturais, do mar, concellos, escolas de surf, e particulares, todos eles despregando o seu labor baixo as máis estritas medidas de seguridade anti-COVID.
Na listade de praias que van ser obxecto de limpeza atópanse as de Aguieira e Caveiro en Porto do Son. No primeiro caso participarán os integrantes de ADEGA Compostela e no segundo o alumnado do IES de Porto do Son. Tamén haberá traballos de limpeza de lixo en Outes, nun areal aínda por concretar e cunha quedada organizada polo Concello.
Na limpeza simultánea participarán asemade os gobernos locais de Ponteareas, Nigrán, A Guarda, A Coruña, Carballo e O Grove.
Esta actividade consiste en congregar a un mesmo tempo nas praias galegas centos de voluntarios e
voluntarias que queiran participar na retirada do lixo que acaba nas praias co gallo de concienciar e
sensibilizar a cidadanía sobre a problemática do lixo mariño, que afecta a todos os mares e océanos do planeta, e tamén aos galegos. A este respecto, ADEGA lembra que cada ano van parar aos mares 10 millóns de toneladas de lixo xerado polo ser humano.