Implanta un confinamento nocturno en toda España menos en Canarias e permite ás autonomías pechar o seu territorio e limitar as reunións.
O presidente do Goberno, Pedro Sánchez, anunciou na roda posterior ao Consello de Ministros extraordinario celebrado este domingo a aprobación do estado de alarma para toda España que entrará en vigor esta tarde, e que implantará un confinamento nocturno en todo o territorio, menos en Canarias, entre as 23 horas e as 6.00 –modulable lixeiramente–. Ademais, pediu apoio ao PP para prorrogalo esta mesma semana no Congreso durante seis meses, ata o 9 de maio, aínda que xa ten apoio suficiente para facelo.
“O estado de alarma é a ferramenta constitucional para situacións extremas e a situación que vivimos é extrema”, argumentou Sánchez, quen defendeu a necesidade de adoptar xa medidas contundentes, co obxectivo de evitar ter que recorrer de novo ao confinamento domiciliario como en marzo.
O decreto aprobado este domingo concede aos presidentes autonómicos ser a autoridade delegada nas súas comunidades, e permítelles ademais confinar total ou parcialmente os seus territorios. Así mesmo, establécese que o espazo de cogobernanza entre as diferentes CCAA, e onde se detallarán novas medidas ou se modularán as actuais, será o Consello Interterritorial do Sistema Nacional de Saúde ( CISNS).
