O Concello da Pobra comezou esta semana os traballos da segunda fase de actuación do Camiño Real, deixándose para datas vindeiras a primeira das fases (ao ser dependente só do Concello da Pobra a través do remanente de 2018, mentres que o primeiro treito dos traballos enmárcase no Plan de Obras e Servizos da Deputación da Coruña e sairá proximamente a licitación). O alcalde Xosé Lois Piñeiro e a concelleira de Servizos Municipais, Estefanía Ramos, desprazáronse este venres ao lugar dos traballos.
A edil expuxo que a dita actuación consiste na roza e na limpeza, no corte e na fresadura do pavimento, firme de aglomerado en quente e implantación dun pequeno muro de contención de pedra granítica por cuestións de seguridade (de 82’72 metros cadrados e catro metros de altura no seu punto máis elevado). No total, esta fase engloba 4.800’89 metros cadrados. A obra foi adxudicada á empresa Nemesio Ordóñez S.A. e o importe ascende aos 69.797’20 euros (cunha rebaixa de 37.781’73 euros sobre o prezo de licitación), cun prazo de execución dun mes.
O rexedor fixo saber que, amais da reposición do pavimento, tamén se vai mellorar a recollida de pluviais e solicitarase a conexión ao saneamento daquelas vivendas dese tramo que aínda non o fixeron, o cal cualificou como “unha oportunidade importante porque lles sairá máis barato ao non se ter que pagar a reposición do firme”. Seguindo este fío, a empresa concesionaria do servizo percorrerá os domicilios do lugar para poñerse en contacto coa veciñanza.
O rexedor engadiu que en datas vindeiras procederase á mellora do cruceiro das Maricas, para o cal tentarase soterrar os cables que o rodean, ademais de deixar preparada a construción para, máis adiante, efectuar unha zona de protección do referido cruceiro. Así mesmo, o mandatario local anunciou que haberá unha terceira fase, para completar así a reforma total do Camiño Real.
