A Xunta incorporou 30 centros educativos de toda Galicia ao programa Radio na Biblio, unha iniciativa da Consellería de Cultura e Educación para favorecer a posta en marcha de emisoras ou laboratorios radiofónicos da contorna das bibliotecas escolares. Coas novas adhesións, a cifra total de centros (de Infantil, Primaria, ESO, Bacharelato e FP integrados no Plan de Mellora de Bibliotecas Escolares, PLAMBE) que participan na experiencia é de 109. Entre as adhesións acabadas de confirmarse atópase a do CEIP Plurilingüe O Grupo de Ribeira.
Os novos centros seleccionados recibirán 2.000 € de fondos para a posta en marcha dun laboratorio de radio (incluíndo un obradoiro de formación). Contarán co apoio da Asesoría de Bibliotecas Escolares da Consellería, que orientará o seu desenvolvemento e porá á súa disposición recursos e propostas.
Así mesmo, os centros que xa participaron en Radio na Biblio en cursos anteriores e renovan recibirán unha asignación de 500 € por centro para a realización de obradoiros de formación específica para o funcionamento da emisora ou ben de lectura expresiva ou de mellora da expresión oral.