A pasada semana o Consello Xeral de Colexios Oficiais de Podólogos anunciaba os cambios realizados na súa xunta de goberno, así o até de agora presidente do Colexio de Podólogos de Galicia, o boirense Juan Dios Tomé, pasa a ser o novo secretario da organización.
Emporiso, o posto de presidencia do Consello pasa a mans de Elena Carrascosa, actual presidenta do Colexio de Podólogos de Castela-A Mancha, representando deste xeito a 7.500 profesionais da podoloxía. Engadir que Carrascosa substituirá a José García Mostazo, presente na organización podiátrica colexial os últimos oito anos. A candidatura de Carrascosa foi proclamada ao ser a única presentada nas eleccións.
Segundo fixeron saber fontes do consello xeral, o relevo na directiva “é un relevo tranquilo que dá continuidade á xestión do anterior equipo e incorpora persoas para dar un novo impulso á institución”.
Dios destaca que os principais obxectivos deste mandato serán “conseguir a inclusión dos podólogos na carteira de servizos da sanidade pública, loitar contra o intrusismo na profesión, difundir o labor dos podólogos entre a poboación e incentivar as relacións institucionais do Consello Xeral coa Administración pública”.
Un profesional sanitario, podólogo e enfermeiro en Barbanza
Juan Dios exerce a práctica clínica privada en Boiro (A Coruña). É diplomado en Enfermaría pola Universidade de Vigo e diplomado en Podoloxía pola Universidade da Coruña (2001-2004). Realizou o seu posgrao en 2009 en Técnica Ortopédica pola Universidade Internacional de Cataluña. Ademais, realizou o Mestrado Universitario en Cirurxía Podológica de Mínima Incisión para podólogos pola Universidade Católica de Valencia San Vicente Mártir en 2019.
Con relación á súa actividade colexial, exerceu como vogal e responsábel da área de formación do Colexio de Podólogos de Galicia de 2015 a 2019, e desde 2019 é o presidente do Colexio profesional.