O Bloque Nacionalista Galego vai solicitar ao Parlamento galego o aumento das análises das augas do INTECMAR, o Instituto Tecnolóxico para o Control do Medio Mariño de Galicia. Segundo fai saber o BNG, “as carencias nos estudos das augas feitos polo instituto provocan en moitos casos a necesidade de ratificar os datos facilitados a través de mostras propias por parte de confrarías e bateeiros”. Ao fío desta eiva, produtores, depuradores, exportadores e cocedeiros transmitiron aos nacionalistas as súas críticas polo traballo despregado pola Xunta, insistindo en que as “carencias agrávanse polo feito de non existir información facilitada polo INTECMAR nas fins de semana e festivos, situación” que, no caso de existir toxina nas augas, sinalan os produtores, “provoca que a perda xornadas de traballo” e “tirar miles de quilos de produto”.
O BNG lembra que o último exemplo disto aconteceu co peche dos bancos marisqueiros de Noia esta última fin de semana: “As mariscadoras e mariscadores terían retomado a súa actividade o luns se non se detectase o alto nivel de toxina na fin de semana por medio de análises realizadas pola propia confraría”. Os nacionalistas opinan que “non se entende como hoxe, cun centro de control mariño público, cun orzamento de máis de 3’6 millóns de euros, non se realicen analíticas durante as fins de semana ou festivos; non é normal que teñan que ser as propias confrarías quen, con fondos propios, teñan que realizar os seus propios estudos microbiolóxicos para garantir a salubridade dos seus produtos”
Por estes motivos o BNG levará ao Parlamento de Galiza unha solicitude para “instar ao Goberno galego a mellorar o funcionamento do INTECMAR e a facer analíticas tamén durante as fins de semana e días festivos, por mor de vixiar constantemente a salubridade dos produtos do mar e a fin de evitar situacións que repercutan negativamente nos produtores e nos consumidores”.
