O BNG de Ribeira fíxose eco das reclamacións da deputada nacionalista Montse Prado acerca da vacina de gripe para todos os colectivos de risco e da necesidade de pór en marcha medidas que garantan o seu subministro a toda esta parte da poboación máis vulnerábel (como mínimo). A deputada criticou o que considera “unha falta de previsión por parte do Goberno galego”, e pediu un informe sobre a actual campaña de vacinación.
A deputada Montserrat Prado queixo reflectir a situación que están a vivir nas últimas datas os centros de saúde, logo de que, segundo explicou, fosen esgotadas as doses para as persoas que xa dispoñían de cita previa para ser vacinadas. A respecto desta reclamación, o BNG de Ribeira, a través do concelleiro Luís Pérez Barral, lembrou que o problema é aplicábel ao concello ribeirense e a unha chea de municipios da nosa xeografía e que a Xunta “actuou sen previsión, logo de facer un chamamento masivo á cidadanía para que se vacinara contra a gripe como medida preventiva no actual contexto COVID e poder así minimizar os contaxios e evitar o colapso do sistema sanitario”.
Ante o esgotamento da vacina, a deputada Montse Prado, considera “inaceptábel que se sume unha nova incerteza a un contexto como o actual e que no ámbito sanitario xa vén marcado por listas de espera para acceder á atención presencial ou dificultades para a atención telefónica”.
Neste sentido, a deputada nacionalista reclámalle ao Goberno galego un informe específico sobre a campaña de vacinación da gripe para coñecer as causas da situación, o número de doses das que se dispón, o cronograma real para a súa disposición e a previsión do número de persoas e colectivos aos que se lles vai poder subministrar.
