O alumnado do Obradoiro de Cociña O Pote, impulsado polo Concello de Ribeira, tivo este mércores 21 unha nova oportunidade para demostrar o seu talento gastronómico e culinario, potenciado ao longo de meses de aprendizaxe, no marco dunha exaltación gastronómica celebrada na Lonxa de Ribeira. O ano de pratos preparados foi amplo, variado e sorprendente, e incluíu contribucións tan rechamantes como hamburguesas de lirio, ameixas con coandro e lima, lombos de xurelo con costra de noz e olivas, tataki de cabala ou vasiños de polbo á galega…
A xornada contou coa participación dunha chea de representantes do tecido hostaleiro e produtivo do municipio e da comarca, que se encargaron de degustar os pratos elaborados polos quince estudantes do taller O Pote baixo a coordinación do seu profesor, Patxi Movilla. Así, estiveron presentes integrantes das empresas Casa Vilas, Luarada, Sursum Corda, Chicolino, Furancho, Xardín, Baiuca, Albariño, Benboa e Casa Hermo, así como de CONGALSA, Armadores de Aguiño, da propia Lonxa de Ribeira (que aportou os produtos do mar cociñados), e da adega Pazo do Mar, que contribuíu cos viños cos que se maridaron os pratos preparados.
Asemade, estivo implicado na iniciativa o selo autonómico PescadeRías, cuxa técnica Ana Pérez encargouse de explicar os puntos fortes dos produtos dos que se botou man durante o showcooking, en tanto que Jandro Ayaso, responsábel de comunicación da Lonxa, destacou a riqueza e calidade dos produtos que se comercializan na rula ribeirense.
Antes do inicio do evento deu a benvida a primeira tenente de alcalde do Concello de Ribeira, María Sampedro, quen agradeceu a presenza e colaboración de todos os asistentes e fixo saber que xa está en marcha o proceso selectivo para desenvolver un novo obradoiro de emprego de cociña “co que seguir incidindo na formación en materia gastronómica no noso municipio”. A actividade, dixo, denominarase O Pote 2 e contará cos participación de quince alumnos que realizarán a aprendizaxe na Escola de Hostalería situada no segundo andar do Mercado Municipal.
María Sampedro recordou tamén que aínda está aberto o prazo para que as empresas hostaleiras que o desexen poidan beneficiarse dos incentivos concedidos polo Concello para a contratación de alumnos ou alumnas do obradoiro O Pote.
Lembrou que segundo as bases preténdese financiar a contratación de ata quince estudantes por un período mínimo de tres meses, cunha subvención única por traballador de 1.500 euros.
