A Garda Civil do Posto de Porto do Son en colaboración coa Patrulla do Servizo de Protección da Natureza (Seprona) da Garda Civil de Noia, a Patrulla Fiscal e de Fronteiras ( PAFIF) de Noia e o vixiante da Confraría de Porto do Son, interveu 1.611 quilogramos de fazula na praia de Caveiro.
Os feitos ocorreron na madrugada deste venres tras alertar o vixiante desa confraría da presenza de catro individuos que supostamente extraían fazula, “actividade prohibida desde o mes de xuño”.
A Garda Civil estableceu un dispositivo e achou varios sacos de cría de mexillón cun peso de 1.611 quilogramos; foi interceptado tamén un remolque de dobre eixo, oito capazos de goma e dúas raspetas.
O incautado foi depositado na Confraría de Porto do Son e o remolque, os capazos e as raspetas nas dependencias do Servizo de Gardacostas da Xunta de Galicia.
