O auditorio da Casa da Cultura de Lousame acollerá este domingo 25 de outubro, ás 19.00 horas, a comedia teatral Running, da compañía De Ste Xeito, un espectáculo organizado polo Concello de Lousame en colaboración coa Deputación da Coruña. A asistencia é totalmente de balde, se ben o aforo será moi limitado debido á aplicación dos protocolos preventivos fronte á COVID-19. Así, os veciños e veciñas que desexen asistir deberán reservar canto antes a súa entrada na Casa da Cultura (981 825 780).
Segundo lembra o Concello, Running é unha comedia escrita e dirixida por Esther F. Carrodeguas e interpretada por Stephy Laryora e Sergio Macías. É unha obra de dous actores sobre un escenario que “levan” sobre os seus ombreiros vinte personaxes que porán en escena unha divertida parodia da vida actual, coas súas eternas presas, teléfonos móbiles, obrigas familiares, persoais e laborais… para reflexionar sobre a cabida que ten o amor nesta vertixinosa vida.
