O santiagués Emilio Vázquez Fernández fixo na noite pasada no Centro Cultural Lustres Rivas o seu debut literario presentando a súa obra “50 años de mentiras”, publicado polo selo Letrame Editorial.
No acto estivo acompañado pola concelleira de Cultura de Ribeira María Sampedro, e pola responsable do Servizo Municipal de Normalización Lingüística, Alicia Padín, ante un público no que se respectaron as novas limiracións de aforo, non excedendo as trinta persoas.
Emilio Vázquez (residente en Escarabote e que traballa como axente do Servizo de Vixilancia Aduaneira) explicou que escribiu este libro durante o período de confinamento con motivo do Estado de Alarma e destacou a súa variedade temática. Neste senso, a obra combina poesías, pequenos relatos e reflexións sobre a natureza humana ao longo de 96 páxinas.
María Sampedro animou ao autor a publicar un segundo libro e subliñou a casualidade de que na sala museo municipal de Ribeira se está acoller unha exposición con fotografías creadas tamén durante o Estado de Alarma: “Unha familia” de Ana Crujeiros que se pode visitar ata o 10 de decembro.
O acto de onte concluíu coa firma de exemplares do seu libro polo autor.
