A Garda Civil de Boiro detivo a dous veciños da localidade como presuntos autores de 15 delitos de roubo con forza, un de furto e outro de furto de uso de vehículo de motor, na fase de explotación da ‘Operación Bremera’.
Esta operación iniciouse pcomo consecuencia do elevado número de denuncias ante a Benemérita en Boiro. As vítimas explicaron que os seus establecementos foran obxecto de roubos con forza e subtraíanlles do seu interior diversos electrodomésticos, aparellos electrónicos, produtos de cosmética, nalgún caso a caixa rexistradora coa recadación no seu interior e, nunha delas, o furto dun vehículo, descoñecendo en todas a autoría dos feitos.
No transcurso da investigación a Garda Civil constatou a existencia dunha serie de feitos ilícitos similares se ben as vítimas non puxeran denuncia. A contía total do subtraído ascende a uns 11.000 euros.
Como froito da investigación policial ao longo de varios meses de investigación, a Garda Civil logrou a identificación dos autores dos mesmos e á recuperación de parte dos obxectos subtraídos. Como consecuencia procedeuse á detención de dúas persoas, como presuntos autores de 15 delitos de roubo con forza, un de furto e outro de furto de uso de vehículo de motor.
A Garda Civil puxo aos detidos ao dispor do xulgado de Instrución de garda de Ribeira, cuxo titular decretou o seu ingreso en prisión sen fianza.
