O espazo de traballo do Obradoiro de Emprego O Pote impulsado polo Concello de Ribeira acolleu na mañá deste 28 de outubro unha clase maxistral gastronómica impartida por profesionais do departamento de Investigación, Desenvolvemento, Innovación e Marketing da empresa de alimentación CONGALSA, referente galego e estatal no ámbito dos produtos do mar. Os profesionais da firma da Pobra mostraron ao alumnado do obradoiro como debe realizarse correctamente o proceso de cociñado e presentación de produtos.
A marca escollida para realizar a exhibición foi Ibercook Food Service, destinada ao canal Horeca, unha das máis emblemáticas da empresa de produtos precociñados con sede na Pobra do Caramiñal.
A actividade, programada polo Obradoiro de Emprego O Pote, pretende dar resposta á necesidade de conectar a formación co mundo laboral.
CONGALSA, cunha facturación superior aos 83 millóns de euros, mobilizou en 2019 máis de 24´5 millóns de toneladas de produtos das súas diferentes gamas.
