CONGALSA, a referencial empresa de alimentación emprazada na Pobra do Caramiñal, deu este outono un novo e importante paso na súa vertente solidaria. En concreto, anunciou que doará dous palets de produtos de seu, que inclúen 2.000 quilos de empanadillas, ao Banco de Alimentos da Coruña, entidade coa que xa ten colaborado a empresa de produtos e conxelados do mar. “Quixemos atender novamente á chamada desta entidade social”, sinalan fontes de CONGALSA, destacando o traballo do Banco de Alimentos cos colectivos que se atopan en situación de vulnerabilidade trala pandemia.
Tal e como salienta a directora de Relacións Externas da compañía, Isabel Cañas, “con esta iniciativa solidaria, contribuiremos a que o Banco de Alimentos da Coruña poida seguir realizando o seu encomiable labor a prol das persoas máis necesitadas”.
A acción enmárcase dentro da política de Responsabilidade Social Corporativa da compañía, que apoia a máis dun centenar de entidades sociais, culturais e deportivas, principalmente situadas na comarca do Barbanza, para favorecer que poidan desenvolver as súas actividades.
