Os centros educativos da Pobra do Caramiñal van acoller esta tempada actividades divulgativas sobre a píllara, o medio natural no que vive (os nosos areais e dunas, principalmente) e a necesidade de protexer e coidar este medio. As actividades abéiranse ao Proxecto de conservación da píllara das dunas (Charadrius alexandrinus) nas praias da península do Barbanza, que ten continuidade este ano. Foi desenvolvido en 2019 por parte de SEO/BirdLife co financiamento da Deputación da Coruña.
O Concello da Pobra do Caramiñal xa participara neste proxecto no pasado exercicio a través de senllas charlas divulgativas nos CEP Salustiano Rey Eiras e Pilar Maestú Sierra, así como dun coloquio para o público en xeral.
Enfocado no ámbito da educación e do coñecemento, este ano proseguirase coa divulgación que fai SEO/BirdLife nos centros de ensino, polo cal no martes 6 terán lugar diversas actividades.
Cómpre sinalar que a píllara das dunas está en retroceso poboacional no ámbito español e galego, onde conta con menos de 90 parellas reprodutoras e, na comarca do Barbanza, atópase ao redor do 30/40% da poboación galega. Pódense atopar máis datos e actividades relacionadas con esta e outras especies nun dos blogs de SEO vencellados á nosa costa.
