Aberta a inscrición para participar no curso de poda e plantación ecolóxica do Concello de Boiro

O Concello de Boiro está a organizar unha actividade formativa sobre poda ecolóxica que, segundo indica o Goberno local, xa ten aberto o prazo de inscrición. Trátase do curso Froiteiras: plantación e coidado en ecolóxico, previsto para os meses de novembro e febreiro na finca de Goiáns, os luns alternos en horario de 17.00 a 21.00 horas. A data de inicio do curso é o 16 de novembro.

O alumnado participante vai aprender técnicas de poda e enxerto de froiteiras, orientadas cara a esta época do ano na que as árbores comezan a perder a folla. As clases prácticas vanse celebrar nun espazo acondicionado da finca do Pazo de Goiáns, nun espazo habilitado como horto para estas actividades. Os clases serán os días 16 e 30 de novembro, o 14 de decembro, os días 11 e 25 de xaneiro e os días 8 e 22 de febreiro.

O prezo da matrícula é de 50 euros, que se aboará unha vez se formalice a matrícula. A presinscrición está aberta ata o día 6 de novembro e as persoas interesadas teñen que facelo cubrindo o formulario que teñen á súa disposición na web municipal ou na portería da Casa Consistorial. Toda a información sobre o curso disposición das persoas interesadas no teléfono 981 84 48 00 ext. 5909 ou no enderezo electrónico correo@boiro.org.