A Deputación e o CEIDA impulsan actividades de formación e divulgación ambiental en Corrubedo

03 Outubro 2020

A Deputación da Coruña e o Centro de Extensión Universitaria e Divulgación Ambiental de Galicia (CEIDA), con sede no Castelo de Santa Cruz (Oleiros) impulsan o ambicioso programa de actividades de formación e divulgación ambiental “Para unha transición ecolóxica” que inclúe numerosas accións dirixidas a diversos sectores da cidadanía.

O presidente da Deputación, Valentín González Formoso, o director do CEIDA, Carlos Vales, e o deputado responsable da área de Emprego e Transición Ecolóxica, José Ramón Rioboo, asinaron hoxe o convenio, que contempla unha achega económica de 150.000 euros por parte da institución provincial para a realización das actividades.

Visitas guiadas, charlas, obradoiros, talleres de capacitación, exposicións itinerantes ou un servizo de asesoramento ambiental para concellos son algunhas das accións que leva a cabo o CEIDA dentro deste proxecto, co que pretende educar, capacitar e divulgar as principais problemáticas ambientais ás que se enfronta a sociedade para poder darlles solución. Tamén busca poñer en valor o patrimonio natural e cultural da provincia.

Por unha banda, atópanse as destinadas ao alumnado dos centros educativos da provincia. A través deste programa, os escolares realizan visitas guiadas a diferentes espazos naturais, coas que se busca fomentar a conservación do patrimonio, especialmente do mariño, e da biodiversidade. Tamén se están a levar a cabo charlas e obradoiros centrados en temáticas como a emerxencia climática, a problemática do lixo mariño e a conservación dos nosos océanos, así como a riqueza dos espazos protexidos e as oportunidades que brindan para o desenvolvemento socioeconómico local. Así, póñense en valor nestes obradoiros e sensibilízase sobre o patrimonio natural dos parques naturais de Corrubedo, das Fragas do Eume e da Reserva de Biosfera Mariñas Coruñesas e Terras do Mandeo. Tres importantes espazos naturais situados na contorna coruñesa.

Apoio aos concellos para desenvolver estratexias medioambientais

O programa tamén permite capacitar a técnicos municipais e políticos en materia de transición ecolóxica, co obxectivo de formar ao mundo local neste eido para desenvolver estratexias concretas que permitan protexer o medio e impulsar un desenvolvemento social e económico municipal baseado no respecto ao planeta.

Á súa vez, conta con 7 exposicións itinerantes, que buscan achegar a todos os recunchos da provincia máis información medioambiental para dar visibilidade e concienciar sobre os desafíos e retos na conservación da biodiversidade. As mostras tratan a problemática do lixo mariño, o cambio climático, a protección de ecosistemas mariños e costeiros ou o patrimonio marítimo de Galicia, entre outros.

Por último, a Deputación tamén pon a disposición de técnicos municipais o servizo de asesoramento e documentación ambiental do CEIDA. O centro, que traballa desde 2001 en programas de educación ambiental, conta co único fondo especializado en medio ambiente de toda Galicia, que abrangue documentación relacionada coa xestión ambiental municipal.

A Deputación e o CEIDA pretenden ofrecer a través destas actuacións unha ampla e variada proposta que permita concienciar aos diferentes axentes da cidadanía e construír unha sociedade civil que estea capacitada e sensibilizada sobre estes problemas para darlles solución.

Outros artigos

Falece unha ribeirense de 50 anos atopada no chan da súa casa

Unha muller de 50 anos, cuxa identidade responde as iniciais T.M.M., faleceu esta noite na súa casa da céntrica Rúa Méndez Núñez, de Ribeira. Segundo informa o Diario de Arousa , foi a súa parella a que ao redor das oito do serán chamou o 112 para comunicar que non...

+

Publicidade

Revista en papel

Opinión

“Hacia la España federal”. Xosé Perozo

“Hacia la España federal”. Xosé Perozo

Si se cumplen las predicciones demoscópicas, el próximo domingo EH Bildu ganará las elecciones en el País Vasco, superando por primera vez al PNV en escaños y en votos. El fenómeno de crecimiento abertzale está rasgando las vestiduras de muchos politólogos y...